СЛУЖБА СВЯТОМУ ПРАВЕДНОМУ ПРЕСВИТЕРУ ИОАННУ, КРОНШТАДТСКОМУ ЧУДОТВОРЦУ

Месяца декембрия в 20-й день

Краегранесие: Светильниче земли Русския, праведне отче Иоанне, молися Богу о приносящих ти похвалу сию.

НА МАЛЕЙ ВЕЧЕРНИ

На ГОСПОДИ ВОЗЗВАХ: Стихиры, глас 2-й:

Светильника веры и благочестия, / молитвенника к Богу теплаго, / восхвалим, вернии, в пениих и песнех духовных, / Иоанна, праведнаго пастыря Кронштадтскаго, / егоже Христос чудесы многими прослави / и дивна Церкви Российстей показа.

Всех радость Христос / возвесели сердце твое, Иоанне, / егда отроку еще ти сущу, / подвигшуся на молитву ко Источнику Премудрости, / дадеся ти разум и смысл ко учению, / еже утешати и наставляти всех ко спасению.

Елицы Христови суть, / плоть распяша со страстьми и похотьми, / якоже Апостол Павел рече. / Сего ради и ты, святе Иоанне, / измлада потщался еси / правилом сим жительствовати, образ показуя всем ко спасению.

Телесныя немощи препобеждая, / духовне восходил еси от силы в силу, / преуспевая возрастом и премудростию, / созидая себе в жилище Божие Духом, / сподобился еси, отче Иоанне, / видения храма Божия, / в немже во священстве до кончины Богу послужил еси.

СЛАВА, глас 8-й:

Иоанне праведне и милостиве, / добродетель любве стяжавый, / яже, по Апостолу, николиже отпадает, / яви и нам благодатную помощь твою, / да обрящем богатство благотворения / молитвами твоими.

И НЫНЕ, Богородичен, глас тойже:

Любовию Твоею, Мати Дево Владычице, / покрываеши всех притекающих к Сыну Твоему и Богу нашему, / мы же, грешнии, кающеся, / все упование на Тя возлагаем и молимся: / сохрани нас под кровом Твоим.

НА СТИХОВНЕ СТИХИРЫ, глас 1-й:

ПОДОБЕН: Небесных чинов радование:

Никтоже притекаяй к тебе, / святый пастырю наш, / тощь и неутешен отыде, / но вси радость получаша и наставление ко спасению.

СТИХ: Свет возсия праведнику / и правым сердцем веселие.

Имея сердце твое присно обращенное ко Господу, / исполнился еси милости и сострадания / к униженным и отверженным людем Божиим, / имже и ныне не престаеши благодетельствовати, / подая молитвами твоими, отче Иоанне, / потребная ко спасению.

СТИХ: Готово сердце его / уповати на Господа.

Чистоту душевную хранити / поучал еси паству твою, святе Иоанне, / чистоту мысли и слова, / яко образ чистоты и непорочности, в себе являя. / Сподоби нас молитвами твоими чистоту сердечную стяжати.

СЛАВА, глас 6-й:

Еже о нас исполнив смотрение, / любовию земная с Небесными соединил еси, Господи, / сице глаголя: / идеже есмь Аз, тамо и слуга Мой будет. / Веруем, яко и служитель Твой Иоанн / во обителех святых молится, / о еже пребывати нам с Тобою, Господи.

И НЫНЕ, Богородичен, глас тойже:

Земля неоранная явилася еси, / Мати Благословенная, / возрастившая нам Клас Живота, / от Негоже всяк ядый не умирает, / якоже рече, Богородительнице, всех Питатель.

НА ВЕЛИЦЕЙ ВЕЧЕРНИ

НА ГОСПОДИ, ВОЗЗВАХ: Стихиры, глас 6-й:

ПОДОБЕН: Все отложше:

Единороднаго Сына Божия возлюбил еси, / и Тому Единому служити возжелел еси, / святе Иоанне, / Емуже вверился еси, глаголя: / жизнь моя во Христе есть. / Сего ради потщался еси / вся ко благоугождению Господеви / и мудрствовати, и деяти.

Молитвенника теплаго / и благодатнаго пастыря видим тя, отче Иоанне, / мнозем бо людем, к тебе притекающим, / являеши в скорбех утешение, / в недузех многоразличных исцеление, / в нуждах сущим и страждущим / присное вспоможение / и до ныне в чудодействиих не оскудеваеши.

Лествицею добродетелей шествуя, / делатель неленостный / вертограда Господня явился еси, отче Иоанне, / от млада даже до последняго часа добре потрудился еси. / Тако и нас молитвенно укрепи / Господеви работати.

Иоанне праведне, / врачу благодатный, / силою молитв твоих / исцелял еси ближних и дальних, / любовию во Христе объемля, / тех наставлял еси обращатися к Богу, / всем по вере помощь подающему.

Различен милования образ / и широка заповедь сия, / рече златословесный Иоанн. / Ты же, пастырю милостивый, / в сих добродетелех многоразлично подвизавыйся, / дом трудолюбия создавый, / нас быти чуждых праздности научи.

Уединенному пустынножителю, / преподобному Иоанну Рыльскому подражая, / егоже именем во святем крещении наречен был еси, / Иоанне праведне, / удалился еси от всякаго мирскаго пристрастия, / во Христе Единем житие свое утвердив, / научи и нас благочестному жительству.

СЛАВА, глас тойже:

Селения святых наследовал еси, / отче Иоанне праведне, / во свете Лица Божия / зриши нужды с верою притекающих к тебе, / коемуждо потребная яже ко спасению подавая. / Сего ради и мы, / на помощь твою уповающе, молимся: / моли Христа Бога / спастися душам нашим.

И НЫНЕ, Предпразднства, глас тойже: Вертепе, благоукрасися:

Вход. Прокимен дне.

И чтения три преподобническия.

НА ЛИТИИ СТИХИРЫ, глас 2-й:

Слова Божия служителю, / словесы Евангельскими назидал еси сердце твое, / в молитве и богомыслии присно пребывая, / разум богопросвещен стяжал еси, отче Иоанне, / путь к Богу писаньми твоими нам указуя, / молися о душах наших.

Ко Христу, Солнцу Правды, молитвенно обращаяся, / поучения душеспасительная о Нем / в книзе твоей изложил еси, / отче праведне, / да вси вернии, Тайнам Божия домостроительства спасения нашего поучающеся, / жизнь вечную наследуют.

Истинныя веры проповедниче, / словом и писаньми догматы Православия изъяснял еси, / лжеучителям противоборствуя, / на недвижимем Камени веры утверждаяся, / во славу Церкве Христовы потрудился еси. / Укрепи и нас молитвами твоими, отче Иоанне, / в верности Православней Церкви пребывати / и в ней спастися нам.

СЛАВА, глас 7-й:

Явился еси людем Божиим / наставник спасения, / образ сострадания и духовнаго утешения: / не точию бо пастве Кронштадтстей, / но и всей Руси, отче Иоанне богомудре, / благодеяния источаеши. / Сего ради, празднующе память твою, / славим Господа, дивнаго во Святых Своих.

И НЫНЕ, глас тойже:

Притекающе под кров Твой, Дево Богородице, / вемы Тя христиан Предстательницу, / к Сыну бо Твоему и Богу нашему / присно молебне руце Твои о нас простираеши, Всенепорочная, / и спасаеши от бед верою и любовию Богородицу Тя почитающих.

НА СТИХОВНЕ, Стихиры, глас 5-й:

Ревностию о славе Божией распаляемь, поучал еси паству твою / всячески хранити сердце свое от страстей, / душу растлевающих и от Бога разлучающих. / Моли о нас, отче святый Иоанне, / да управим житие наше к славе Имене Божия и спасению.

СТИХ: Свет возсия праведнику / и правым сердцем веселие.

Апостольским подвигом подражая, / отче Иоанне предивне, / душу о спасении ближних полагал еси, / взыскуя не своих си, но ближняго. / Ныне же предстоя Престолу Святыя Троицы, / непрестанно молися о почитающих память Твою.

СТИХ: Готово сердце его / уповати на Господа.

Все богатство веры / открыл ми еси, Господи, / благодарне взывал еси, Иоанне праведне, / ко Источнику любве и премудрости Богу, / от Негоже познал еси словеса спасительная. / Имиже согревая хладная сердца наша, / направляеши ко спасению.

СЛАВА, глас 8-й:

Единому Богу любовию прилепляяся, святе Иоанне, / присно попечение о страждущих и отверженных имея, / скорый помощник тем явился еси, / сего ради сила благодати Божия / содеявает тобою велия чудеса, / обращая неверных к вере во Христа и к жизни во славу Божию.

И НЫНЕ, Предпразднства, или Богородичен, глас тойже:

Девственнии лицы святых на Небеси / и подвижницы благочестия на земли / девству и чистоте от Тебе, Дево Безневестная, научившиися, / воплотившемуся от Тебе Сыну и Богу поклоняющеся, / славят Рождество Твое, Благодатная.

ТРОПАРЬ, глас 1-й:

Православныя веры поборниче, / земли Российския печальниче, / пастырем правило и образе верным, / покаяния и жизни во Христе проповедниче, / Божественных Таин благоговейный служителю / и дерзновенный о людех молитвенниче, / отче праведный Иоанне, / целителю и предивный чудотворче, / граду Кронштадту похвало / и Церкве нашея украшение, / моли Всеблагаго Бога / умирити мир и спасти души наша.

Ин ТРОПАРЬ, глас 4-й:

Российския земли пастырь добрый показался еси, / в служении пресвитерстем жизнь во Христе стяжав, / Богомудре отче Иоанне. / Благодать изобильную от Владыки Христа приял еси: / недуги отгоняти, / малодушныя утешати, / в Тайне Пречистаго Тела и Крови верныя со Христом соединяти. / Сего ради восхваляем тя, / яко молитвенника о душах наших.

НА УТРЕНИ

По 1-й кафисме седален, глас 4-й:

Неизреченно милостив и долготерпелив Господь ко мне, / рекл еси, святе Иоанне, / тако и мне подобает милостиву быти. / Сего ради нищия и убогия возлюбил еси, / яко меньшую Христову братию, / имже всеусердно послужив, / Царствия Небеснаго наследник явился еси.

СЛАВА И НЫНЕ, Богородичен, или Предпразднства.

По 2-й кафисме седален, глас 5-й:

Ежеденное совершение Божественных Таин / благодатною силою в молитвеннем подвизе укрепляше тя, святе Иоанне. / Сего ради поучал еси, / яко Безкровная Жертва торжество любве Божия к роду человеческому есть / и всесильное ходатайство о спасении нашем. / Ныне же, святе Иоанне, присно Богу предстоя, / молися и нам сея благодати достойным причастником быти.

СЛАВА И НЫНЕ, Богородичен, или Предпразднства.

По полиелеи седален, глас 8-й:

Отеческою любовию всех объемля, / самых падших во глубину греха не отвращался еси, / ненавидя грех, ко грешным милосердуя, / к покаянию их приводил еси, / Ангелом Небесным подобяся, / обращению заблудших и покаянию их радуяся, / Иоанне праведне.

СЛАВА, И НЫНЕ, Богородичен, или Предпразднства.

Таже степенна, 1-й антифон 4-го гласа.

ПРОКИМЕН, глас 4-й: Возвеселится праведник о Господе / и уповает на Него.

СТИХ: Услыши, Боже, глас мой, внегда молитимися к Тебе.

Всякое дыхание:

ЕВАНГЕЛИЕ от Матфея, зачало 16: Рече Господь: Внемлите милостыни вашея:

По 50-м псалме стихира, глас 6-й:

Тя земнаго ангела, / Небеснаго человека, / любве Христовы носителя, / земли Российския печальника / и о всем мире молитвенника, / заступника обидимых, / образ трудолюбия, чудотворца предивнаго / почитаем, Иоанне праведне, / благодаряще Бога, / прославляющаго святыя Своя.

КАНОН, глас 1-й:

Песнь 1-я

ИРМОС: Песнь победную поим вси Богу:

Чистоту помышлений даждь ми, Спасе мой, / еже воспети чистотою Ангелом подобнаго, праведнаго Иоанна пресвитера, / яко Ангела Господа Вседержителя.

Еже любити Христа и Ему служити, Иоанне святе, / делом и словом исполнил еси, / во священстве верным образ быв словом и житием.

Иоанну Крестителю подражая, / ты, отче Иоанне праведне, / образ воздержания, целомудрия и девственника чистоту явил еси.

БОГОРОДИЧЕН: Облагодати нас, Мати Божия, / еже к Богоугождению житие наше управити, / да Твоею помощию и молитвами праведнаго Иоанна живот вечный наследуем.

Песнь 3-я

ИРМОС: Камень, егоже небрегоша зиждущии:

Апостольски трудился еси / от утра пастырскаго жития твоего даже до вечера, отче Иоанне, / николиже в любви к Богу и ближнему оскудевая.

Небеснаго Царствия взыскуя, / усердный делатель благих на земли явился еси, / молитвою веры недуги исцеляя и заблудшия к покаянию призывая, святе.

Никогоже отвращался еси, / точию отвергающихся Господа Иисуса Христа и Церкве Его Святыя, / Ейже сыны века сего противляются. / Но и о сих заблудших в скорби мнозей моление твое к Богу возносити не преставал еси.

БОГОРОДИЧЕН: Единение верных в Церкви Сына Твоего и Бога нашего сохрани, / Пречистая Дево Мати, / да присно в любви Христове друг ко другу утвердимся.

Седален, глас 2-й:

Мы, немощнии, к тебе, праведне Иоанне, / яко сильному молитвеннику пред Богом, притекаем, / просяще недугом душевным и телесным исцеления, / в скорбех о гресех наших покаянием избавления, / стране нашей и людем ея мирное жительство / и вся потребная ко спасению.

СЛАВА, И НЫНЕ, Предпразднства, или Богородичен:

Отроковице Благодатная, / Мати Безневестная, Надеждо нашего спасения, / даждь нам в вере утверждение и во благочестивем житии преуспеяние, / в скорбех и печалех утешение. / Тя бо, яко Рождшую Спаса Христа, присно величаем.

Песнь 4-я

ИРМОС: Духом провидя Аввакум Словесе воплощение:

Ложное мудрование сынов века сего, возстающих противу истины Святыя Церкве Христовы, / отвергл еси, святе Иоанне, / словом и житием Православие утверждал еси, поя: / слава силе Твоей, Господи.

Имя Христово присно в сердце нося, святому Богоносцу Игнатию подражая, / в себе самом всякое приражение греха истребил еси, поя: / слава силе Твоей, Господи.

Сила Божия, в немощи совершающаяся, яви тя дивнаго чудотворца, / целителя недужных и немощных, учителя покаяния, молитвы делателя, поюща: / слава силе Твоей, Господи.

БОГОРОДИЧЕН: Явилася еси, Владычице Богородице, Благодатная Помощница праведному пресвитеру Иоанну, / присно молящемуся Ти и Сыну Твоему и благодарно поющему: / слава силе Твоей, Господи.

Песнь 5-я

ИРМОС: Твой мир даждь нам, Сыне Божий:

Благо мне, яко смирил мя еси, Господи, / сице молился еси, терпя поношения хулителей твоих, святе Иоанне, / храня мир сердца твоего непрестанною молитвою и незлобием.

Облекся во Христа верою и причастием Святых Таин, / был еси тверд, яко скала, глаголя: / мне Христос полнота всех благ, Живот и Мир, превосходяй всяк ум.

Господни Трапезы присно причащаяся, / стяжал еси Свет Христов, просвещающий всякаго человека, грядущаго в мир. / Сим же и нас просвети, Иоанне светоносче, тя почитающих.

БОГОРОДИЧЕН: Ужасошася всяческая о Божественней славе Твоей, Пречистая Дево, / общники славы Твоея соделай и нас, / Тя присно ублажающих.

Песнь 6-я

ИРМОС: Пророку Ионе подражая, вопию:

Оживляя душу непрестанною ко Господу молитвою, / сице взывал еси, Иоанне богомудре: / Господи, даждь ми любити всякаго человека, яко самаго себе. / Сию добродетель помози и нам стяжати.

Призывая имя Божие во спасение твое, / спасению многих послужил еси. / Да пребудем и мы в единении с Богом и любви между собою, / молимтися, отче Иоанне.

Разум богопросвещенный стяжал еси, Иоанне премудре, / о Святей Троице богословствовал еси, / призывая в простоте сердца веровати.

БОГОРОДИЧЕН: Избавителя нашего неизреченно рождшая, Пресвятая Дево, / буди нам грешным прибежище спасения / и вечныя жизни Ходатаица.

КОНДАК, глас 3-й:

Днесь пастырь Кронштадтский предстоит Престолу Божию / и усердно молит о верных / Христа Пастыреначальника, / обетования Давшаго: / созижду Церковь Мою / и врата адова не одолеют ея.

ИКОС: Восхвалим, вернии, дивнаго пастыря Кронштадтского, благодати тезоименитаго, / светильника присногорящаго у Престола Святыя Троицы, / с Богородицею и со всеми святыми земли Российския / молящагося о спасении всех, Имя Господне призывающих, / да укрепится в стране нашей Православие / силою Христа Пастыреначальника, обетование Давшаго: / созижду Церковь Мою, и врата адова не одолеют ея.

Песнь 7-я

ИРМОС: Сущим в пещи отроком Твоим, Спасе:

Настави нас, пастырю добрый, жизни во Христе, / по слову бо твоему, велико делание есть, еже побеждати грех, в нас живущий. / Помолися, да не опалится душа наша пламенем его.

Очищение наше и избавление есть Христос Спаситель, / Емуже ты, пастырю пречудный, / о нашем духовнем возрождении, чрез покаяние и исправление, помолися.

Силою Духа Святаго в непрестанней молитве / безстрастие стяжавый, добрый пастырю Иоанне, / страстей любогреховных нам избавитися помолися.

БОГОРОДИЧЕН: Яви нам милость Твою, Богородице Дево, Мати Живота, / к Тебе с верою притекающим / и Сыну Твоему и Богу покаяние приносящим.

Песнь 8-я

ИРМОС: Егоже ужасаются ангели:

Щедрою рукою твоею милостыню просящим подавал еси, Иоанне милостиве. / Не веде бо шуйца, еже твори десница твоя, / тщету бо земнаго стяжания на Небесная пременил еси.

Имущему дано будет и преизбудет, рече Господь, / тако и ты, отче Иоанне, тщанием велиим благодать Духа Святаго стяжал еси, / еюже и нас молитвами твоими ныне ущедри.

Хранение устом полагая, николиже суетная возглаголал еси, Иоанне, / закона Господня взыскуя, / и нас в нем ходити присно научаеши.

БОГОРОДИЧЕН: Тя, Богородицу Вышшую Небес и Чистшую светлостей солнечных, / в песнех немолчных воспевают Херувими и Серафими. / С нимиже и мы, недостойнии, Тя ублажаем.

Песнь 9-я

ИРМОС: Живоприемный источник приснотекущий:

Иисуса Христа Пастыреначальника образ в себе нося, Иоанне, / уготовал еси по вся дни душу твою за паству полагати / и во гресех погибающих к Богу обращати.

Приносящих ти похвалу сию, отче Иоанне, / не отрини, но милость Христа Бога испроси / к прощению многих прегрешений.

Очима твоима присно взирая ко Господу, отче Иоанне, / врата сердца твоего отверста Ему имел еси, / да отверзется и нам дверь покаяния молитвами твоими.

БОГОРОДИЧЕН: Христа Бога нашего, прежде век от Отца рожденнаго без матере, / Рождшагося же от Тебе без отца нас ради, / моли, Чистая Богоневесто, да спасение улучим, Тя величающе.

СВЕТИЛЕН:

Весь исполнился еси Света Христова, освятив себе Богови, / просвети и нас светом благодати Духа Святаго / молитвами твоими, Иоанне светоносне.

СЛАВА И НЫНЕ, Богородичен:

Ангели на Небеси и человецы на земли Тя, / Богородице, яко Матерь Света, / непрестанно величаем.

НА ХВАЛИТЕХ СТИХИРЫ, глас 8-й:

Ликуй светло, граде святаго Петра, / имея в себе днесь прославленныя святыя угодники Божии: Ксению блаженную, дивную молитвенницу, / и праведнаго Иоанна, пастыря Кронштадтскаго, / светильника веры и чудотворца изрядна. / Взыграйте, людие Божии, / в песнех и пениих радующеся, / Христа славяще и угодники Его, / присно молящиеся о душах наших.

Устне твои разума исполнистася, / и закону Господню от уст твоих поучахуся людие, / Иоанне предивне, иерею Божий, / ныне же со Ангелы предстоя Святей Троице, / молися о почитающих память твою.

Словесы твоими и писаньми вдохновенными / путь к Богу указуеши / и жизни во Христе поучаеши, / Солнце Правды, Христа, проповедуя, / истинный Клас Живота, / Трапезу безсмертия в Тайне Пречистых Тела и Крове / нам уготовляющаго.

СЛАВА, глас 6-й: Истиннаго пастыря тя почитаем, / отче Иоанне праведне, / явил бо еси в себе образ Пастыреначальника Христа, / ныне же зрением неизреченныя Славы Его наслаждаешися / и прошения наша слышиши, / молися даровати нам полезная ко спасению.

И НЫНЕ, глас тойже: Южика Твоя, Пресвятая Дево, / Елисавет, мати Предтечева, / первее всех земнородных / Богородицу Тя нарече, глаголющи: / откуду мне сие, / да прииде Мати Господа Моего ко мне. / Мы же Тя, Благословенную в женах, / вси роди христианстии, / без истления Бога Слова Рождшую, / присно величаем.

ИЛИ ПРЕДПРАЗДНСТВА, глас тойже: Приближается Христос:

НА ЛИТУРГИИ:

ПРОКИМЕН, глас 7-й: Возвеселится праведник о Господе / и уповает на Него.

СТИХ: Услыши, Боже, глас мой, внегда молитимися к Тебе.

АПОСТОЛ, зачало 311. Аллилуиа, глас 4: Праведник, яко финикс процветет, яко кедр, иже в Ливане, умножится.

СТИХ: Насаждени в дому Господни во дворех Бога нашего процветут.

ЕВАНГЕЛИЕ от Матфея, зачало 11: Рече Господь: вы есте свет мира:

ПРИЧАСТЕН: В память вечную будет праведник: